BAR 2026 sa Cebu City malinawon

CEBU, Philippines — Walay mga nahitabo nga nakabalda sa  2026 Bar Examinations sa University of San Jose-Recoletos (USJ-R) Basak Campus sa Cebu City nga nahuman kagahapon, Septiyembre 13, 2026 sumala pa sa kapolisan.

Sumala sa PRO7, mokabat sa 203 ka personnel gikan sa nagkalain-laing ahensya ang gipakatap sa examination venue alang sa seguridad, pagdumala sa trapiko ug mga tawo, emergency response ug medical assistance.

Gilangkuban kini sa mga personnel gikan sa PRO7, Bureau of Fire Protection (BFP), Cebu City Transportation Office (CCTO), Barangay Public Safety Officers (BPSO), mga barangay, Philippine Coast Guard (PCG), Cebu City Disaster Risk Reduction and Management Office (CDRRMO) ug medical team sa USJ-R.

Gibanabana usab sa PRO7 nga mga 1,500 ka tawo ang nagtigom gawas sa examination venue aron mosuporta ug mo-cheer sa mga examinees.

Ang Cebu City Police Office (CCPO) ang nanguna sa deployment ug post-operation debriefing aron masusi ang pagpatuman sa security plan ug ang mga leksyon nga magamit sa umaabot nga dagkong kalihokan, sumala sa PRO7. Gidayeg ni PRO7 Regional Director PBGen Arnold E. Abad ang mga personnel ug partner agencies nga miapil sa security operation.

Matuud ni Abad, ang pagtapos sa 2026 Bar Examinations nga walay untoward incident nagpakita sa pagpangandam, deployment sa personnel ug koordinasyon tali sa nagkalain-laing ahensya. (BANAT NEWS)