Mandaue Heartline ilusad karong Septiyembre 10

CEBU, Philippines — Mas dali na nga mapahimuslan sa mga taga-Mandaue ang serbisyo alang sa mental health human ilusad sa city government ang usa ka dedicated hotline karong Septiyembre 10, 2026, nga motakdo sa pag-obserbar sa World Suicide Prevention Day.

Gitawag og Mandaue Heartline ang maong serbisyo nga gitukod ubos sa Substance Abuse and Mental Health Services Office o SAMHSO.

Pinaagi sa hotline, ang mga residente nga adunay mental health concerns mahimong direktang makatawag ug makigsulti sa mga trained psychometricians nga maminaw sa ilang mga problema, motimbang sa ilang kahimtang ug mo-refer kanila sa tukmang serbisyo kung gikinahanglan.

Matud ni SAMHSO head Niño Krisbayani Dargantes sa iyang interbyu kagahapon, gihimo ang hotline isip tubag sa panginahanglan sa mga residente nga adunay kasaligan nga tawo nga ilang maduolan panahon sa lisod nga mga sitwasyon.

Giingon ni Dargantes nga si Mayor Thadeo Jovito “Jonkie” Ouano maoy miduso sa paghimo sa maong serbisyo human nangutana kung unsaon pa pagpalambo sa siyudad sa mental health concerns.

Unom ka psychometricians ang motubag sa mga tawag sa hotline.  Matud ni Dargantes, gusto sa mayor nga mga trained mental health professionals mismo ang motubag sa mga caller imbes nga ordinaryong personnel lamang ang mag-atiman sa hotline.

Ang mga psychometricians motimbang sa concerns sa mga motawag ug motino kung gikinahanglan ba nila og dugang intervention.

Ang mga nanginahanglan og mas taas nga lebel sa pag-atiman mahimong i-refer ngadto sa psychologists ug psychiatrists pinaagi sa kasamtangang network sa siyudad, lakip na ang Vicente Sotto Memorial Medical Center (VSMMC).

Adunay duha ka dedicated mobile numbers ang hotline—usa para sa Globe ug usa para sa Smart telecommunications services.

Matud ni Dargantes, ang mga psychometricians miagi og usa ka semana nga training nga gipahigayon sa Department of Health (DOH) pinaagi sa National Center for Mental Health.

Apil usab sa maong training ang mga personnel gikan sa Disaster Risk Reduction and Management Office (DRRMO), City Health Office (CHO) ug city hospital. Gidala usab sa opisina ang mga mental health advocacy activities ngadto sa 27 ka barangay sa Mandaue.

Matud ni Dargantes, gusto usab ni Mayor Ouano nga ang mental health services sa siyudad mas maduol sa mga residente sa barangay ug dili lamang magpabilin sulod sa City Hall.

“Usa sa iyang gusto nga ipabuhat sa amoa kay we have to go to the barangays for mental health advocacies. Mas maayo didto gyud sa community,” matud ni Dargantes.

Opisyal nga magsugod ang operasyon sa Mandaue Heartline atol sa paglusad niini karong Septiyembre 10, 2026. — MEL BANAT NEWS