NNC nagpalig-on sa mga programa sa LGU batok malnutrisyon

CEBU, Philippines — Gipalig-on sa National Nutrition Council (NNC) ang programa nga gipangulohan sa mga lokal nga pangagamhanan aron mapugngan ang malnutrisyon ug mapanalipdan ang mga bata sulod sa unang 1,000 ka adlaw sa ilang kinabuhi.

Gibanabana nga 8.7 milyon ka batang ubos sa lima ka tuig ang target sa mga nutrition intervention sa gobyerno. Matud ni DOH Undersecretary ug NNC Executive Director IV Dr. Albert Francis E. Domingo, ang NNC ubos sa Presidential Decree No. 491 nag-unang papel sa paghimo og polisiya ug koordinasyon, dili sa direktang pagpatuman sa dagkong feeding program.

Ang pundo alang sa dietary supplementation ipasa ngadto sa mga local government unit (LGU) aron ang mga lokal nga opisyal ug community health workers makapatuman sa mga programa base sa panginahanglan sa ilang mga komunidad.

Usbon usab sa NNC ang sistema sa pag-monitor sa performance sa LGU. Imbis nga administratibong compliance lamang ang sukdon, mas tutokan na ang aktuwal nga resulta, lakip ang pagkunhod sa stunting, wasting ug underweight sa mga bata.

Lakip sa estratehiya ang pagpalapad sa “Unang Yakap” First 1,000 Days benefit package uban sa PhilHealth ug Department of Health. Naglakip kini sa nutrisyon ug pag-atiman gikan sa wala pa ang pagmabdos hangtod sa unang mga tuig sa bata, lakip ang antenatal care, pagbakuna, exclusive breastfeeding ug hustong complementary feeding.

Ang kapin 42,000 ka Barangay Nutrition Scholars (BNS) maoy usa sa mga nag-unang frontliner sa pag-ila ug pagmonitor sa mga batang malnourished, ilabina sa mga hilit nga komunidad.

Matud sa NNC sa ilang gipadala nga mensahe nga ang paghatag og dugang gahum sa LGU ug pagsukod sa tinuod nga resulta sa mga programa importante aron masiguro nga ang pundo sa gobyerno moresulta sa mas himsog ug stunting-free nga henerasyon. — /MEL (BANAT NEWS)