Baricuatro niluwat og EO nga nag-umol sa CBMS

CEBU, Philippines — Aron masiguro nga ang mga programa ug proyekto sa gobiyerno ibase sa tukmang datos, gipirmahan ni Cebu Governor Pamela Baricuatro ang Executive Order (EO) No. 31, Series of 2026 nga nag-umol sa Provincial Community-Based Monitoring System (CBMS) Coordinating Board.

Base sa maong executive order tumong sa paghimo sa Provincial CBMS Coordinating Board ang pagpalig-on sa data-driven governance pinaagi sa mas episyenteng pagplano, pagpatuman ug pag-monitor sa mga programa sa kagamhanan sa tibuok lalawigan. Ang CBMS usa kini ka technology-based nga sestema sa pagkolekta, pagproseso ug pag-validate sa datos nga gamiton sa pag-ila sa mga benepisyaryo, paghimo sa lokal nga development plans ug pagsukod sa epekto sa mga programa sa gobiyerno.

Gibasehan sa EO ang Akta Republika No. 11315 kun “Community-Based Monitoring System Act” nga nag-institutionalize sa CBMS isip usa ka importante nga kahimanan alang sa evidence-based planning, program implementation ug poverty monitoring sa tanang siyudad ug lungsod sa nasud. Gitumbok usab sa maong balaod nga ang Philippine Statistics Authority (PSA) maoy nag-unang implementing agency sa CBMS ug adunay responsibilidad sa pagkoordinar sa national agencies ug local government units aron masiguro ang luwas ug episyenteng pagpaambit sa datos. (BANAT NEWS)