Ika-6 na suspek sa Marine Biologist kilala na

MANILA, Philippines — Anim na ang suspek na natukoy ng Philippine National Police (PNP) na umano’y sangkot sa pagpatay sa Amerikanong Marine Biologist na si Dr. Kent Carpenter sa Sibulan, Negros ­Oriental.

Sinabi ni PNP Public Information Office na si P/Colonel Allen Rae Co na ang pang-anim ay ang kapatid ng panlimang suspek na si alyas “Eden,” na kapwa at-large.

Patuloy pa rin, aniya ang isinasagawang imbestigasyon para alamin ang naging partisipasyon ng bagong natukoy na suspek, at kung may iba pang mga indibidwal na sangkot.

Nakapiit na ang apat habang ang magkapatid ay nakatakdang sampahan ng reklamo sa piskalya, kahit hindi pa nadarakip. Pagnanakaw pa rin ang nakikitang pangunahing motibo sa pamamaslang kay Carpenter.

Sa kasalukuyan, hinihintay pa ang resulta ng ginawang pagsusuri ng PNP Crime Laboratory sa sample kaugnay sa sinasabing panggagahasa sa live-in partner ni Carpenter.