Duha ka pagpamomba niangol og lima

CEBU, Philippines — Duha ka insidente sa pagpanglabay og granada ang nahitabo sa Sultan Kudarat sa Maguindanao del Norte adtong Sabado, ang target mga sundalo. Ang pagpanglabay og granada gihimo samtang nagkaduol na ang pinakaunang parliamentary election sa Bangsamoro Autonomous Region in Muslim Mindanao (BARMM) nga mahitabo karong Septiyembre.

Niadtong Sabado sa gabii, usa ka lalaking sakay og motorsiklo ang nihunong duol sa usa ka Army detachment sa Sultan Kudarat ug gilabay og granada ang maong kampo.

Walay naigo sa maong pagpangatake diha sa Army detachment sa Charlie Company 7th Infantry Battalion nga nahimutang sa Cotabato-Davao Highway sa Barangay Macaguiling sa Sultan Kudarat.

Matud pa ni Police Capt. Steffie Salanguit, tigpamaba sa PRO-BAR ang suspek daling nisibat padung sa habagatang bahin sa Sultan Kudarat.

Sayo anang adlawa, duha ka sakop sa 4th Scout Ranger Company nga silang Cpl. Jessie Jay Bulanay ug Cpl. Arnel Calapan ug mga sibilyang sila si John Dave Usman Santiago, Bassir Amban Batong ug Pamiya Upam Bulingkig ang nangaangol tungod sa shrapnel sa granadang gilabay diha sa highway sa Barangay Mother Poblacion, Shariff Aguak, Maguindanao del Sur.

Duha ka mga lalaking riding in tandem ang naghimo sa krimen nga nakuha sa mga CCTV cameras sa mga establisamento sa lugar.

Ang usa nila maoy nilabay sa granada ngadto sa KM 450 truck sa mga sundalo , apan nasipyat ug didto nitugpa sa karsada ang granada ug didto kini nibuto.

Daling niikyas ang mga suspek samtang ang mga nasamdan daling gidala sa Bangsamoro Regional Medical Center in Shariff Aguak tor treatment.

Sumala pa sa mga lokal nga mga opisyal sa Maguindanao del Norte ug Maguindanao del Sur sa BARMM ,kaning pag-atake nga gi-target ang mga sundalo, bawos kini sa mga nahibiling pipila ka miyembro sa teroristang Bangsamoro Islamic Freedom Fighters human napatay ang ilang lider nga si Esmael Tingan Abubakar sa engkwentro tali sa mga polis ug sundalo sa Sitio Tambak, Barangay Calsada, Sultan Kudarat.

Padung unta serbihan og arrest warrant sa daghang kasong murder ug multiple frustrated murder, arson, drugas ug extortion cases si Abubakar , apan nisukol kini hinungdan nga siya napatay. — /IBM (BANAT NEWS)