Cebu Greats padayong nagmangtas sa MPBL

CEBU, Philippines — Human gilampornas ang Negros Hacienderos, ang Cebu Greats mipadayon sa ilang dominasyon batok sa Negrense nilang mga karibal.

Si Mark Meneses mikadlit og 18 puntos uban ang walo ka rebounds, pito ka assists, duha ka steals ug usa ka block sa dihang gikastigo sa Cebu ang Bacolod Mascarras, 97-67, alang sa ikapito nilang sagunson nga daog sa SportsPlus Maharlika Pilipinas Basketball League (MPBL) Season 8 niadtong Huybes, Hulyo 9, didto sa STRIKE Gymnasium sa Bacoor, Cavite.

Midugang si Jun Manzo og 13 puntos, duha ka rebounds ug usa ka steal samtang si Limuel Tampus miposte og double-double nga 12 puntos ug 13 ka rebounds uban ang lima ka assists ug usa ka steal alang sa Greats, nga midaog sa ika-12 nga higayon sa miagi nilang 13 ka duwa aron pahugtan ang ilang pagkupot sa ikaduhang puwesto sa South Division standings bitbit ang 14-3 rekord.

Si Ron Dennison miamot og 10 puntos alang sa Cebu, nga milusad og eksplosibong opensiba sa ikaduhang kuwarter aron kontrolahan ang duwa.

Ang Cebu alkansi og tres puntos, 20-23, human sa unang kuwarter apan mitagak og 26-10 nga bomba aron pagrehistro og 46-33 nga bentaha sa halftime.

Wala na molingi pa sukad niadto ang Cebu, nga sa usa ka higayon miabante og 35 puntos, 95-60, sa 3-pointer ni

Al Francis Tamsi sa nahibilin nga 5:20 sa duwa.

Ang Greats nangandam na karon alang sa giatngan nilang duha ka sagunson nga home games batok sa Biñan Tatak Gel karong Hulyo 16 didto sa Hoops Dome sa dakbayan sa Lapu-Lapu ug batok sa Batang Kankaloo karong Hulyo 18 sa Cebu Coliseum.