Lim bagong Chef de Mission sa Asian Games

MANILA, Philippines — Itinalaga ng Philippine Olympic Committee (POC) si karate association head Ricky Lim bilang bagong Chef de Mission (CdM) sa 20th Asian Games sa Aichi-Nagoya, Japan.

Ito ay matapos ang pagbibitiw ni Al Panlilio sa nasabing posisyon, ayon kay POC president Abraham “Bambol” Tolentino.

“Al (Panlilio) admitted to us that it would be unfair to everyone if he cannot give his 100 percent commitment as chef de mission for our Filipino athletes and delegates in the Asian Games,” ani Tolentino sa POC General Assembly. “We accepted his resignation.”

Nahalal si Panlilio bilang bagong pangulo ng golf association noong Abril bukod sa pagkakaluklok sa kanya bilang chairman ng cryptocurrency company BlockShoals Technologies noong Hulyo 1.

Makakatuwang ni Lim ng Karate Pilipinas bilang CdM sina deputy CdMs Samahang Basketbol ng Pilipinas executive director Erika Dy, Jarryd Bello ng Curling Pilipinas, Alexander Sulit ng Philippine Judo Federation at Jop Malonzo ng vovinam.

Pamumunuan ni 2024 Paris Olympics double gold medalist gymnast Carlos Yulo ang 429 Pinoy athletes na sasalang sa 40 sa kabuuang 43 sports sa Aichi-Nagoya Asiad na nakatakda sa Setyembre 19 hanggang Oktubre 4.