Gimonitor sa ex

Dear Tito Miguel,

Ako diay si Isabel, 25 anyos, taga Barangay Guadalupe, Cebu City.

Adunay usa ka lalaki nga akong gihigugma kaniadto. Tawgon nato siya og Alex. Dugay usab mi nag-uyab, apan tungod sa kanunayng panaglalis ug dili na magkasinabtanay, nagbulag mi. Nadawat na nako nga wala na gyud mi ug naningkamot ko nga ipadayon ang akong kinabuhi.

Apan bisan ex na mi, murag dili gihapon siya makabiya sa akong kinabuhi. Kanunay siyang mangumusta kung asa ko, kinsa akong kuyog, ug unsa akong gibuhat. Kung makakita siya nga naa koy kauban nga lalaki, mangutana dayon siya ug usahay masuko pa.

Usahay mabati nako nga nagpakabana gihapon siya kanako. Apan kung pangutan-on nako siya kung gusto ba niyang magkabalik mi, dili man siya mohatag og klarong tubag. Moingon lang siya nga gusto lang niya nga luwas ug okay ko.

Dili ba unfair nga gusto niya nga bantayan gihapon ko bisan wala na mi? Usahay malipay ko sa iyang pagpakabana, apan usahay mabati usab nako nga murag dili ko hingpit nga makapadayon tungod kay anaa gihapon siya kanunay sa akong palibot. — Isabel

* * *

Isabel,

Aron hingpit ka nga maka move on, kinahanglan na nimo putlon tanan ninyo nga komunikasyon. Kun wala’y klaro iyang tubag kun ganahan ba siya magkabalik mo, usa ra’y buot pasabot ana, wala siya’y plano.

Kay kun desidido pa siya makig-uli nimo, unsa may babag nga nakapugong niya? Wala man kaha ka’y uyab, basin siya naa na. Igo ra man diay siya maniguro kun luwas ka, buot pasabot nakonsensiya lang siya nga nagbuwag mo ug karon nag-inusara ka. Basin iyang tan-aw nimo huyang ug kuwang kun wala siya. Sa laktod, naluoy lang siya kanimo. Madawat ba nimo nga mosulod balik sa inyong relasyon tungod lang sa kaluoy?

Busa ipakita kaniya nga kaya nimo mag-inusara. Usa ka ebidensiya nga imong inawong niya kay ang pagpanirado sa tanan lutsanan nga magka-istorya mo. Ingna ka’y buwag na man mo, imo na putlon tanan ninyong komunikasyon, maski isip higala na lang. Ingna daghan na ka’g higala, kun siya man lang ang idugang, maayo pa di na mapun-an.

Ex na gani, ayaw na’g lingi. Kun kunohay masuko siya nga naa kay kauban nga lalaki, dili na pasabot nga gusto niya kamo ang mag-uban. Ang tinuod, dili siya gusto makauyab ka ug malipay sa lain. Sa laktod, selfish siya. Para niya siya ra ang angay malipay, wa ka’y apil. Wala siya magselos, di lang siya gusto nga ikaw makabalos. — Tito Miguel

Magpatambag ka? Ipada kang Tito Miguel: 0991-318-9366