Bakakon nga uyab

Dear Tito Miguel,

Ako diay si Jaja, taga Barili, Cebu, ug suki gyud ko sa imong lindog dinhi sa Banat News.

Aduna koy uyab nga ginganlan og Inting ug siyam ka buwan na diay ang among relasyon. Sa sinugdanan, abi nako og matinud-anon siya ug seryoso sa among panag-uban. Apan nagkadugay, nabantayan nako nga permi na lang siya mamakak bisan sa gagmayng butang.

Usahay, moingon si Inting nga naa siya sa trabaho apan mahibaw-aw na lang nako sa laing tawo nga wala siya mosulod sa trabaho. Aduna puy mga higayon nga maghimo siya og mga istoryang dili magkatakdo, ug kung akong pangutan-on, ako pa hinuon ang iyang basolon nga kuno sobra ra ko ka selosa.

Daghang higayon nga akong gipasaylo si Inting tungod kay gihigugma nako siya ug naglaom ko nga mausab pa siya. Apan samtang nagdagan ang panahon, murag nagkadaghan na hinuon ang iyang mga bakak. Tungod niini, nawala na ang akong pagsalig kaniya. Kapoy na kaayo nga pirmi ko nga magduhaduha kon tinuod ba ang iyang mga gisulti o dili. Unsa man ang imong ikatambag kanako? Maglisod gyud ko og buhi sa among relasyon kay love nako siya. — Jaja

* * *

Jaja,

Nagbaga nga bandila, kun sa gagmay nga mga butang mamakak siya, unsa lang kaha sa mga dinagko, sama sa pagbudhi o panlingla kanimo? Garantisado iya gyud na itago. Kun dili siya kasaligan sa ginagmay, unsa na lang kaha sa dinagko. Wala nimo giklaro kun unsa ug ngano mamakak siya. Naa siya’y gitago nga laing babaye? Sama sa imo giingon kunohay nisulod siya’g trabaho apan wala diay didto. Asa man siya? Naay laing lakaw nga dili nimo angay mahibaw-an? Duna ba siya’y gipakigkitaan nga laing babaye?

Angay nimo mahibaw-an kun ngano mamakak siya. Tungod ba kay masuko o mopugong ka niya? Basin tungod sab nimo mapugos siya’g pamakak. Hinuon, dili katarungan ang mamakak tungod kay hadlok siya basin masuko ka. Pero ngano masuko man sab ka kun walay igo nga rason? Basin natural ra na niya. Katingalahan apan tinuod, hasta sa mga butang nga dili angay ipamakak, ila gihapon ibakak. Naa sa utok ang problema.

Unya’g magpadayon mo, unsaon man nimo pagkahibalo asa ang bakak ug asa ang tinuod? Magsige lang ka’g butikaw ug panag-an? Kinahanglan imong pares sa kinabuhi matinud-anon sa buhat ug sa pulong. Dili na mistil pa pamatud-an unsa iyang gisulti. Sa laktod, kinahanglan mosalig ka niya. Ang problema ka’y dili siya kasaligan. Kun imong gugma dili makapa-usab niya, angay na ka magduha duha. Kun magsige lang siya’g pamakak, wala’y padulngan inyong relasyon, wala ka’y kalipay ug kalinaw. — Tito Miguel

Magpatambag ka? Ipada kang Tito Miguel: 0991-318-9366