Gikawras tungod sa utang

CEBU, Philippines — Nasamdan ang usa ka 21-anyos nga Indian national human giingong gikambras ug gisagpa sa laing Indian national atol sa panaglalis tungod sa utang sa Barangay Banilad, Dakbayan sa Sugbo niadtong Hunyo 17, 2026.

Ang giakusahan mao ang usa ka 24-anyos nga lalaki nga gipasanginlang nangambras sa liog ug nawong sa biktima.

Sa imbestigasyon, nasayran nga naglalis ang duha ka habig sa wala pa nahitabo ang insidente.

Pipila ka minuto human sa ilang panaglalis, gikambras umano sa suspek ang liog ug naw’ng sa biktima hinungdan nga nasamad kini.

Misaysay usab ang biktima nga gawas sa pagpangambras, gisagpa pa gyud siya sa suspek atol sa komprontasyon.

Apan gihimakak kini sa suspek, matud niya giwakli ra niya ang kamot sa biktima human gibira niini ang iyang t-shirt kay gikwelyohan siya ani.

Midugang pa ang suspek nga iyang gipaningil ang biktima sa utang nga P30,000 kay iyaha na untang gamiton pang- allowance kay usa man siya ka medical student, apan nasuko matud pa ang biktima.

Nasayran usab nga igsuon sa uyab sa suspek ang biktima ug naanad na ni nga mangutang niya og kwarta.

Bisan pa sa nahitabo, nagkasabot ra ang duha nga aregluhon ang ilang kasungian. (BANAT NEWS)