Sen. Joel dadalo sa special session ng Senado

MANILA, Philippines — Kung sakaling ipatawag ni Pangulong Ferdinand “Bongbong” Marcos, Jr ay tiniyak ni Senador Joel Villanueva nitong Linggo na dadalo siya sa isang special session.

Sa isang mensahe sa video na ipinalabas sa misa tuwing Linggo ng Jesus is Lord (JIL) Church, kinilala ni Villanueva na ang kasalukuyang alitan sa pamumuno sa Senado ay lubos na nakaapekto sa institusyon.

Panahon na aniya para isantabi ang anumang pagkakaiba sa politika para sa sambayanang Pilipino.

Sa kanyang mensahe sa kongregasyon ng JIL, binigyang-diin din ni Villanueva ang pangangailangang tiyakin na ang mga kawani ng Senado ay hindi “naiipit sa gitna ng labanan.”

“Sa pagkakataon po na magkaroon ng special session tutuparin po natin ang ating sagradong tungkulin sa ilalim ng ating Saligang batas,” dagdag ni Villanueva.

Nauna nang iginiit ng kampo ni Acting Senate President Sherwin Gatchalian ang pagdaraos ng special session kasunod ng pagkabigo ng Mataas na Kapulungan na ayusin ang alitan sa liderato bago ito mag-adjourn sine die noong Hunyo 6.

Binigyang-diin ni Gatchalian ang pangangailangang magpasa ng ilang mahahalagang hakbang, kabilang ang kumpirmasyon ng ilang opisyal ng Armed Forces of the Philippines (AFP) at Department of Foreign Affairs (DFA) na ang mga promosyon ay natigil matapos patalsikin ng grupo ni Sen. Alan Peter Cayetano ang noo’y Senate president na si Vicente “Tito” Sotto III.