Nganong di masulbad?

Samtang naglalis pa ang kadaghanan may quorum ba gyud sa senado dihang gitangtang sa 12 ka mga senador si Alan Peter Cayetano isip ilang presidente ug gitudlo si Sherwin Gatchalian isip senate president for tempore ug acting senate president, daghan sa mga estudyante sa mga publikong tunghaan ang mobalik sa klase karong adlawa nga way classroom, way lingkoranan ug way maestra.

Dinhi sa dakbayan sa Sugbo, mipasidaan na ang kagamhanan ug ang Department of Education nga way classroom ug hayan sa tent magklase ang mga tinun-an sa Barangay Buot Taup.

Kini tungod kay ang ilang eskwelahan apektado sa pagdahili sa yuta. Gawas sa Buot Taup duna pay laing mga tunghaan sa syudad sa Sugbo ang piligro sab ang kahimtang ug hayan magkuwang sab ang mga classroom.

Ug sigurado ko nga ang problema sa mga lawak saringan dili lang dinhi sa Sugbo masinati pagbukas sa klase karong adlawa kun dili sa tibuok nasud.

Problema nga sa matagtuig atong giatubang ug wa gyud mahatagi og sulbad.

Ug tingali nangutana mo nganong sa kadugay na niining maong problema wala man gihapon masulbad.

Tingali sayop ta tungod kay ang atong  gipaabot nga motubag sa maong pangutana mao man ang atong mga opisyal.

Mas kita maoy angayang motubag sa maong pangutana. Atong pangutan-on atong kaugalingon ngano man tuod nga sa kadugay na niining maong problema wala man gyud masulbad?

Ang simpleng tubag mao nga nasayop ta pagpili sa mga tawo nga atong gitugyanan tungod kay mas gipili nato ang mga clown nga politiko inay ang may tinuod nga katakos sa pagsulbad sa mga problema nga giatubang sa atong nasud.

Tan-awa ang nahitabo dili ba mas nalingaw ang atong mga opisyal sa ilang political circus kay sa pag-atubang sa dakong problema sa atong nasud sama sa krisis sa edukasyon?

Lain ang prioridad sa atong mga politiko ug di tang kabasol nila tungod kay daghan sa mga botante ang labihan ka dali nga ulog-ulogan.

Daghan nato ang moabiba bisan klarong gipatuyok na sa palad.

Nalingaw na kaayo ang kadaghanan nato sa pagsawsaw sa politika nga ato nang nakalimtan ang pagpaningil sa atong mga opisyal sa ilang responsibilidad.

Tungod sa political circus, labi pa sa atong kongreso, nalingaw kaayo ang kadaghanan nga daw sa baliwa nalang nato ang ka inutil sa uban natong mga opisyal.