Gipatay sa anak
CEBU, Philippines — Patay ang usa ka 83-anyos nga mag-uuma human siya gituohang gibunalan sa ulo og kahoy sa iyang anak diha sa Purok Dao, Barangay Basak, Badian, Cebu sa buntag sa Huwebes, Hunyo 4, 2026.
Ang suspek, usa ka 43-anyos nga lalaki, gidakop sa kapolisan pipila lamang ka oras human sa insidente pinaagi sa hot pursuit operation.
Sumala sa Badian Municipal Police Station, nahitabo ang insidente mga alas 10:30 sa buntag.
Ang kapolisan nakadawat sa report mga alas 11:45 sa buntag pinaagi sa Municipal Disaster Risk Reduction and Management Office (MDRRMO) bahin sa maong hitabo.
Ang mga polis ug MDRRMO personnel miadto dayun sa lugar ug gilusad sab ang hot pursuit operation hangtud nadakpan ang suspek sa iyang pinuy-anan sa Barangay Taytay, Badian.
Sa imbestigasyon sa kapolisan, nasayran nga naglalis una ang biktima ug ang iyang anak sa wala pa nahitabo ang insidente.
Atol sa panaglalis, gituohang gibunalan sa suspek ang iyang amahan sa ulo gamit ang piraso sa kahoy.
Gidala dayon ang biktima ngadto sa Badian District Hospital apan gideklarang dead on arrival sa miatimang doktor.
Nagpabilin karon sa kustodiya sa Badian Municipal Police Station ang suspek samtang giandam sa kapolisan ang kasong parricide ubos sa Article 246 sa Revised Penal Code batok kaniya.— IBM BANAT NEWS
- Latest
