Ex pulis, 4 pa timbog!

Drug network nalansag

MANILA, Philippines — Tinatayang nasa P91 milyon ng liquid at fi­nished products ng shabu ang nasamsam sa limang high value individuals na kinabibilangan ng isang dating miyembro ng Phi­lippine National Police sa isinagawang buy-bust operation at pagsalakay ng mga awtoridad sa kanilang hide-out sa Brgy. Sun Valley Parañaque City, nitong Huwebes ng gabi.

Arestado sina alyas “Bossing”, 35; alyas “James”, 49, isang resigned na miyembro ng PNP; alyas “Jezreel”, 29; alyas “Hazel”, 25 at alyas “Ricardo”, 48.

Pinangunahan ng District Drug Enforcement Unit (DDEU-SPD) ang operasyon sa pakikipagtulungan ng PDEA, DID-SPD, HPG-SOD/TF Limbas, RPDEU PRO-4A, RID PRO-4A, PDEG SOU NCR, PDEA Laboratory Service, Para­ñaque CPS SDEU, at Sub-Station 7, dakong alas-6:28 ng gabi ng Abril 9, 2026, sa Block 12, Lot 14, Annex 41 Subdivision, Sycamore St., sa Brgy. Sun Valley.

Bukod sa nasamsam na 13.389 kilo ng powder shabu at limang transparent container ng liquid crystalline substance na may Standard Drug Price na P91,045,200.00, nakumpiska sa mga suspek ang dalawang kalibre .45 ng pistola isang Bushmaster rifle, mobile phones at cash na P319,950.00.

“This operation sends a clear message that no drug syndicate is beyond our reach. The Southern Police District will pursue those who distribute illegal drugs and ensure they are held accountable under the law,” ani Acting District Director Police Colonel Glenn Oliver Cinco.

Isasailalim na sa inquest proceedings ang mga suspek sa rek­lamong paglabag sa Sections 5, 13, at 26, ng Republic Act 9165 at Republic Act 10591 sa Parañaque City Pro­secutor’s Office.