Bitbit na fur pets at halaman kailangan may permit - PPA

MANILA, Philippines — Nagpaalala nitong Sabado ang Philippine Ports Authority (PPA) na kailangang may permit ang mga bibiyahe na may bitbit na halaman o fur pets sa barko.

Sa magkahiwalay na advisories, sinabi ng PPA na dapat ay kumuha ng kaukulang permit sa lokal na Bureau of Animal Industry - National Veterinary Quarantine Services office o magrehistro sa https://nvqsd.bai.gov.ph/#feature para sa pitong araw na shipping permit.

Bukod pa rito, kailangan din na dala sa pagsakay sa barko ang veterinary health certificate na naglalaman ng vaccination history at validity ng bakuna.

Sa may bitbit na halaman, kailangang may shipping permit mula sa Bureau of Plant Industry (BPI) office https://npqsd.bpi-npqsd.com.ph/domestic/.

Ang BPI-National Plant Quarantine Services Division (NPQSD) ang mag-iisyu ng Clearance for Domestic Transport (CDT), dahil sa mga halaman na sakop ng regulasyon at limitasyon.

Kabilang dito ang nasa ilalim ng genus Musa, tulad ng saging at abaca na nililimitahan dahil sa posibleng may taglay na sakit. Dadaan sa pagsusuri ang halaman at maaaring isailalim sa phytosanitary measures .

Muling ipinaalala rin na ang pagdadala ng mapa­nganib na substances gaya ng flammable items, deadly weapons, at alak ay ipinagbabawal sa loob ng mga pantalan at daungan.