Batangan bagong HPG chief

MANILA, Philippines — May bago nang hepe ang Philippine National Police - Highway Patrol Group (PNP-HPG) sa katauhan ni PBGen. Rommel Batangan.

Pinalitan ni Batangan si PBGen. Jessie Tamayao na nagbitiw sa puwesto kasunod ng reklamong sexual harassment na isinampa ng kanyang tauhan sa National Police Commission (NAPOLCOM).

Pirmado ni Directorate for Personnel Records and Management Office Chief, PMGen. Constancio Chinayog Jr. ang assignment order ni Batangan alinsunod sa kautusan ni PNP chief PGen. Jose Melencio Nartatez, Jr.

Nabatid na bago natalaga sa HPG si Batangan ay nagsilbi muna itong Deputy Regional Director for Administration (DRDA) ng Police Regional Office 3 o Central Luzon PNP.

Mariin namang pinabulaanan ni Tamayao ang paratang sa kanya at sinabing siya ay boluntaryong nagbitiw upang bigyang daan ang impartial investigation sa issue.

“My decision to resign is not an admission of guilt, but a demonstration of my commitment to due process and the institutional reputation of the Philippine National Police,” ani Tamayao.

Binigyang-diin pa ni Tamayao na sa 30 taon niya sa serbisyo, pinananatili ang mataas na antas ng propesyunalismo at paggalang sa kaniyang mga katrabaho.