Security escort ni Isko, todas sa tandem
MANILA, Philippines — Patay ang isang security escort ni Manila Mayor Francisco “Isko Moreno” Domagoso matapos na barilin ng riding-in-tandem kahapon ng madaling araw sa Tondo, Maynila.
Sinubukan pa ng mga doktor ng Tondo Medical Center na isalba ang biktimang si George Capistrano, 56, na isang retiradong pulis ngunit binawian din ng buhay dahil sa tinamong mga tama ng bala sa ulo at katawan.
Inaalam naman ng Manila Police District (MPD) ang pagkakakilanlan ng riding-in-tandem na nakasuot ng puting helmet at brown na jacket habang ang angkas naman ay nakasuot ng pulang sapatos, puting t-shirt at asul na helmet.Lulan ang mga ito ng isang Yamaha NMAX.
Batay sa ulat ng MPD, dakong alas-12 ng madaling araw nang maganap ang krimen sa harap ng bahay ni Capistrano sa Salonga St., kanto ng Buendia St., sa Balut, Tondo, sakop ng Brgy. 134.
Batay sa kuha ng CCTV sa lugar, makikita ang biktima na lulan ng kanyang motorsiklo habang sinusundan ng mga suspek.
Hinarang ng mga suspek si Capistrano na bumunot pa ng baril habang pinipilit naman ng mga suspek na makuha ang kanyang kuwintas. Nakaladkad pa si Capistrano hanggang sa mapahiga sa semento. Dito na ito binaril ng isa sa mga suspek hanggang sa tumakas.
Ayon naman kay Domagoso, tinututukan ngayon ang anggulo na robbery-hold up ang motibo ng pamamaslang matapos na tangayin ng mga suspek ang kuwintas ni Capistrano.
Tiniyak naman ni Domagoso na makakamit ng pamilya ni Capistrano ang hustisya.
Samantala, bineberipika na rin ng pulisya ang impormasyon na isang retiradong police official ang nasa likod ng pamamaslang kay Capistrano.
- Latest
