2 BuCor exec sibak sa puwesto

MANILA, Philippines — Dalawang opisyal ng Bureau of Corrections (BuCor) ang sinibak sa puwesto  upang mas mapabuti ang pangangalaga at pagbabantay sa mga Persons Deprived of Liberty (PDLs).

Ito naman ang inihayag ni BuCor Director General Gregorio Catapang, Jr.  kung saan inalis sa posisyon sina Correction Supt. Ricardo Sespene Jr., dating Superintendent ng Leyte Regional Prison, at CT SSUPT Marjorie Ann Sanidad, na namuno sa Correctional Institution for Women.

Inilipat si Sespene sa Bucor Land Control and Management Center Anti-Squatting Unit sa BuCor National Headquarters sa Muntinlupa City, habang si Sanidad ay itatalaga sa New Bilibid Prison Hospital.

Si C/SSupt. Ruben Formoso ang kahalili kay Sespene, habang si CT/SSupt.Daisy Sevilla-Castillote ang hahawak sa mga responsibilidad ni Sanidad. Si Sevilla-Castillote ay dating nagsilbi bilang Superintendent ng San Ramon Prison and Penal Farm.

Kasabay nito, nagkaroon din ng  balasahan sa loob ng  Kawanihan kung saan si C/SSupt. Roger Boncales, na kasalukuyang Superintendent ng NBP ay ililipat sa Sablayan Prison and Penal Farm sa Occidental Min­doro. Papalitan si Boncales ni Iwahig Prison and Penal Farm Superintendent, C/Supt. Gary Garcia.

Si C/Supt. Edgardo Mendoza Jr., na kasalukuyang namumuno sa Davao Prison and Penal Farm, ang papalit kay Garcia sa IPPF. Ang posisyong nabakante ni Mendoza ay pupunan naman ni C/Supt. Abel Ciruela mula sa Sablayan Prison and Penal Farm.

Si C/SSupt. Alfredo Devaras na nagsilbing Commander, NHQ, at Headquarters Support Company Command ay papalit bilang Superintendent ng SRPPF, ang posisyong nabakante ni Sevilla-Castillote.