Quezon City Hall of Justice binulabog ng bomb threat
MANILA, Philippines — Binulabog ng bomb threat ang Quezon City Hall of Justice dahilan upang magsilabasan ang mga empleyado at may transaksiyon nitong Biyernes ng umaga.
Sinasabing isang empleyado mula sa Branch 227 ng korte ang nakatanggap ng mensahe na nagbabala hinggil sa posibleng pagsabog ng bomba kaya nabulabog ang mga empleyado rito.
Agad inutos ni QCRTC Executive Justice Rosanna Fe Maglaya ang agarang paglilikas sa lahat ng mga empleyado at iba pang nasa gusali.
Naging maagap naman ang Quezon City Police District (QCPD) na may K9 units mula sa Explosive and Ordnance Division nang nagsagawa ng inspeksiyon sa gusali.
Ayon kay retired General Elmo San Diego, hepe ng QC Department of Public Order and Safety (DPOS) nagsagawa ng panelling ang mga awtoridad na upang masiguro na walang bomba sa lugar.
Tiniyak naman ng mga awtoridad sa publiko na may precautionary measures na ipatutupad para sa seguridad ng lahat.
- Latest
