Isko, inilatag P2.3 bilyon Forest Park sa Intramuros

MANILA, Philippines — Inihain kahapon ng umaga ni Manila Mayor Francisco “Isko Moreno” Domagoso kay Pangulong Ferdinand R. Marcos Jr., ang disenyo sa planong Intramuros Forest Park, na naglalayong gawing pampublikong open space ang kasalukuyang Intramuros Golf Course. 

Personal na iniabot ni Domagoso ang disenyo kay Executive Secretary Ralph Recto sa isang pagpupulong sa Malacañang.

Sa kanyang liham, binigyan-diin ni Domagoso na ang proyekto, na bahagi ng Legacy Projects ng Pangulo ay naglalayong mapabuti ang kalidad ng buhay ng mga residente ng Maynila.

Nabatid na ang konsepto na ­disenyo, sa tulong ng Asian Development Bank at Arup ay aabot ng P2.3 bilyon, aytsasaklaw sa pag-develop ng lugar, mga pasilidad ng parke, landscaping, at kaugnay na imprastraktura.

Kabilang sa mga pangunahing bahagi nito ang Riverfront Promenade, na nagtatampok ng pangunahing landscaped areas at isang Picnic at Waterfront Area na layong buhayin ang gilid ng Ilog Pasig na may pampublikong pasilidad.

Kabilang dito ang Campus Garden na green space, Outdoor Theater, F&B Area para sa mga kiosk at upuan, at Playground ng mga bata, na naglilikha ng mixed-use civic space para sa libangan, pagtatanghal, at aktibidad ng pamilya.

Idinisenyo ang Gateway Park bilang landscaped entry point, habang ang Urban Park pinagsasama ang Sports Area at Parking facilities, Lookout Area at Riverwalk, at Sports Area at Viewpoint upang pagsamahin ang open space sa aktibong libangan.