Russian vlogger negatibo sa HIV
MANILA, Philippines — Negatibo ang Russian vlogger na si Nikita Chekhov sa Human Immunodeficiency virus (HIV), ayon sa Bureau of Immigration (BI).
Sinabi ni BI Commissioner Joel Anthony Viado, base sa medical examination ni Chekhov na isinagawa ng Department of Health (DOH) ay nakumpirmang non-reactive ito sa HIV o AIDS.
“He was likewise tested for other related illnesses, all of which yielded negative results,” ani Viado. Si Chekhov, 21-anyos ay inaresto ng mga awtoridad sa Quezon City noong Miyerkules matapos namang mag-viral sa social media ang pananakot nitong magpapakalat ng HIV sa bansa.
Ayon sa opisyal ang pananakot ng Russian vlogger sa social media sa pagpapakalat ng HIV ay bunga lamang ng ‘rage-bait’ na naglalayong maghasik ng sindak at magpasiklab sa social media sa maling paraan.
Sinabi ni Viado na patuloy naman ang pakikipagkoordinasyon ng BI sa mga ahensiya ng gobyerno para tiyakin na ang mga umaabusong dayuhan sa batas ng Pilipinas at lumilikha ng public alarm ay parurusahan. Nahaharap na sa deportasyon ang nasabing vlogger matapos namang lumikha ng takot at pagpapanik ng publiko ang social media post nito.
- Latest
