Warehouse pinadlock ng Malabon LGU
Sa P1.5 bilyon puslit na yosi
MANILA, Philippines — Dahil sa kawalan ng business permit at paglabag sa ilang regulasyon, ipinasara ng Malabon LGU ang warehouse kung saan nadiskubre ang mga container van na kinalululanan ng umano’y mga puslit na sigarilyo na nagkakahalaga ng P1.5 bilyon sa Brgy. Maysilo.
Ayon kay Malabon City Mayor Jeannie Sandoval, bigo ang Tala Cargo Solution na magsumite ng mga kinakailangan dokumento matapos ang tatlong araw na palugit na ibinigay ng Bureau of Permit and Licensing Office (BPLO).
Bago ito, nabatid na nagsagawa ng inspeksiyon ang BPLO noong Enero 2 at 5 at pinadalhan ng notice of violation.
Bagama’t ang negosyo ng Tala Cargo Solution ay nakarehistro bilang container yard, sinabi ni Sandoval na limitado lamang ito sa permitting at licensing at hindi kasama ang importasyon.
Matatandaan na sa nasabing container yard tumambad sa mga tauhan ng Philippine National Police-Highway Patrol Group (PNP-HPG) ang tinatayang P1.5 bilyong halaga ng imported na sigarilyo na ipinuslit papasok ng bansa noong Disyembre 31, 2025 matapos na habulin ang isang rider na umiwas sa checkpoint.
- Latest
