Misa Mayor sumentro sa pagpapakumbaba at debosyon
MANILA, Philippines — Sumentro sa pagpapakumbaba at debosyon ang Misa Mayor o Midnight Mass na dinaluhan ng mahigit sa 100,000 deboto para sa pista ng Itim na Poong Nazareno.
Ang naturan Misa Mayor ay pinamunuan ni Balanga Bishop Rufino “Jun” Sescon Jr., na dating rector ng Quiapo Church, dakong alas-12:00 ng madaling araw ng Enero 9.
Sa kanyang homiliya, hinikayat ni Sescon ang mga deboto na tulad ni Hesukristo, ay mamuhay ng may pagmamahal at pagpapakumbaba.
Iniugnay nito ang homiliya sa mga kaganapan sa bansa sa ngayon, kung saan ang ilang opisyal aniya ng bansa na kahit mali at bistado na ay ayaw pa ring bumaba sa puwesto kahit nahihirapan na ang mga mamamayan.
“Sa ating bayan ngayon, may mga ayaw bumaba kahit mali na at bistado na. Ayaw bumaba kahit pahirap na sa bayan. Ayaw bumaba kahit nagdurusa na ang mahihirap. Ayaw bumaba kahit binabaha na at nasisira na ang bayan. Tumigil na, tama na, maawa na kayo sa taong bayan,” ani Sescon.
Ayon sa Manila Police District (MPD), mahigit sa 100,000 deboto ang matiyagang naghintay at dumalo sa Misa Mayor.
Kaagad naman itong sinundan ng Traslacion 2026 na pormal na nagsimula ganap na alas-4:00 ng madaling araw, na pinakamaaga sa buong kasaysayan ng Traslacion.
Samantala, namahagi naman ng pansit at tubig si Jhayr Balboa na dating Chief of Staff dating Manila Vice Mayor Yul Servo sa kahabaan ng Brgy. 312 Zone 31 sa mga deboto ng Nazareno.
- Latest
