Rider kritikal sa pananaksak

Suspek naingayan sa tambutso

MANILA, Philippines — Nasa malubhang kalagayan ang isang 23-anyos na rider nang pagsasaksakin ng dalawang lalaki na naingayan sa muffler o tambutso ng kanyang motorsiklo, sa mismong araw ng Pasko, sa Muntinlupa City.

Nilalapatan ng lunas sa Ospital ng Muntinlupa ang biktimang si alyas “Jon Prix” dahil sa mga tinamong saksak sa iba’t ibang bahagi ng katawan.

Arestado naman sina alyas “Raymond”, 26 at “Jerome”, 20, sa isinagawang follow-up operation ng mga tauhan ni PCol. Robert Domingo, hepe ng Muntinlupa City Police Station.

Sa imbestigasyon, nakaaway ng biktima ang mga suspek madaling araw ng Disyembre 25 sa Barangay Tunasan ng dahil lamang sa tunog ng tambutso.

Nauwi sa pananaksak ng mga suspek ang mainitang pagtatalo bago tumakas, habang ang biktima ay pinagmalasakitan ng mga saksi na agad nagdala sa kanya sa pagamutan.

Pinapurihan naman ni Southern Police District (SPD) District Director PBGen. Randy Arceo ang mga tauhan ng Tunasan Police Sub-Station-1 dahil sa ginawang mabilis na aksyon na nagresulta sa agarang pagkakadakip sa mga suspek.