PNP ikinasa manhunt vs Cassandra Ong
MANILA, Philippines — Mas pinaigting pa ng Philippine National Police (PNP) ang manhunt laban kay Cassandra Li Ong at mga kapwa nito akusado kaugnay ng kinakaharap na kasong qualified human trafficking.
Ayon kay PNP Acting Chief PLtGen. Jose Melencio C. Nartatez, Jr., inatasan na niya ang Criminal Investigation and Detection Group (CIDG) na palakasin ang operasyon hindi lamang laban kay Ong kundi maging sa lahat ng iba pang akusado na may kaugnayan sa operasyon ng Philippine Offshore Gaming Operators (POGOs).
“We do not only focus on Ms. Ong, we will also make sure that all the respondents, whether they are in the Philippines or in abroad, will be located and be taken to the court that issued the arrest warrant,” ani Nartatez.
Mahigit 50 katao ang kinasuhan ng qualified human trafficking kaugnay ng umano’y scam hub na pinatatakbo ng Lucky South 99. Bukod kay Ong, kinasuhan din ang abogadong si Atty. Harry Roque.
Mayo ngayong taon nang naglabas ang Angeles, Pampanga Regional Trial Court Branch 118 ng warrants of arrest laban kina Ong at iba pang suspek.
Kamakailan ay ibinasura ng Court of Appeals ang petisyon ni Ong na kumukuwestiyon sa resolusyon ng DOJ na nag-aatas na sampahan siya ng kaso.
Nitong Martes, sinabi ng Malacañang na nasa Pilipinas pa rin si Ong batay sa mga rekord, sa gitna ng mga ulat na huli umano siyang na-monitor sa Japan.
- Latest
