‘Love Bus’, malasakit sa commuters - LTFRB

MANILA, Philippines — Naniniwala si  Land Transportation Franchising and Regulatory Board (LTFRB) Chairman Teofilo Guadiz III na ang pagbuhay sa “Love Bus” ay pagpapakita ng malasakit ng  Pangulong Ferdinand R. Marcos Jr. sa mga commuter.

Ayon kay Guadiz, sa muling pagbuhay ng Love Bus at pagpapatuloy ng Libreng Sakay Program sa Metro Manila, mabibigay ito ng gaan sa pagbiyahe ng mga mananakay partikular sa kahabaan ng EDSA Carousel route.

Sinabi ni Guadiz, na ang proyekto ay hindi lamang nagsusulong ng abot-kaya at mahusay na paglalakbay kundi nagbibigay din ng ligtas, maaasahan, at marangal na pampublikong transportasyon.

Aniya, milyun-mil­yong commuter ang nakikinabang sa mga libreng sakay sa kabila ng patuloy na pagtaas ng presyo ng gasolina at gastusin sa pamumuhay.

Pareho ang Love Bus at Libreng Sakay ay naaayon sa Public Transport Modernization Program ng gobyerno na layong makalikha ng mas ligtas at commuter-friendly na sistema ng transportasyon.

Unang ipinakilala noong 1970s, muling ibinabalik ang Love Bus sa ilalim ng administrasyong Marcos.