Buntis, kapatid todas sa riding-in-tandem
MANILA, Philippines — Patay ang isang magkapatid na isa rito ay buntis habang sugatan ang kanilang kaibigan matapos na pagbabarilin ng riding-in-tandem kamakalawa ng gabi sa loob ng kanilang bahay sa Novaliches, Quezon City.
Idineklarang dead-on-the-spot ang mga biktimang sina alyas “Angela”, 36, na isang buntis at kapatid na si alyas “Jennifer”, 33, habang ginagamot naman sa ospital ang kaibigang si alyas “Rosa”, 33 pawang mga residente ng Brgy. Gulod, Novaliches, QC.
Batay sa imbestigasyon ng Criminal Investigation and Detection Unit-Quezon City Police District (CIDU-QCPD) nangyari ang insidente bandang alas-8:50 ng gabi sa bahay ng mga biktima sa Villareal St. Brgy. Gulod.
Abala ang mga biktima sa paghahanda ng lootbags na gagamitin sa kaarawan ng kanilang pamangkin nang dumating ang dalawang hindi pa nakikilalang mga suspek.
Sunud-sunod na mga putok ang umalingaw-ngaw hanggang sa tumambad ang duguang mga biktima habang tumakas naman sakay ng motorsiklo ang mga suspek.
Ayon sa ama ng magkapatid na biktima, sinabi ng kanyang anak na si Jennifer na may nagbabanta sa kanya at pinagbigyan umano siya ng “tatlong araw” na palugit. Hindi naman maliwanag kung para saan ang ‘tatlong araw’.
“Bale, based sa witness na nakuha natin, pinasok ‘yung bahay ng dalawang suspek and allegedly may dalang baril both parehas ‘yung suspek may dalang baril and bumaba daw ‘yung mga suspek na ‘yun sa motor, iisang motor ‘yung gamit nila and dire-diretso dun sa bahay,” ayon naman kay PLt. Col. Aljun Belista, hepe ng Novaliches Police Station 4.
Sa pagsisiyasat ng SOCO Team mula QCPDFU sa pangunguna ni PCMS Federico Manzano, nakuha sa crime scene ang tatlong basyo ng cal. 9mm at tatlong basyo ng cal. 45.
- Latest
