SUV sumalpok sa iskul, 7 sugatan

MANILA, Philippines — Isang SUV ang pumasok sa lobby ng isang paaralan sa Caloocan City na ikinasugat ng pito katao kamakalawa ng hapon.

Sa imbestigasyon ng pulisya, bandang alas-4 ng hapon nang mangyari ang insidente sa lobby ng Manila Central University (MCU) Brgy. 81, Caloocan City.

Nabatid na minamaneho ni Manuel Añonuevo, 70, ang kanyang Mitsubishi Montero na may plakang TQK 469 at susundo sa kanyang apo, nang aksidenteng maapakan ang silinyador.

Sa insidente, pito ang sugatan kung saan anim na estudyante na kinabibilangan ng apat na menor-de-edad at isang school staff.

Giit ng driver, nakapreno siya ngunit biglang umarangkada ang sasakyan.

Bagamat nangako ito na tutulong sa gastusin ng mga biktima, maaari pa ring maharap sa kasong reckless imprudence resulting in multiple physical injuries and damage to property.