Retired Journo, inaresto at kinaladkad ng pulis?
Away sa loob ng bus
MANILA, Philippines — Nagsasagawa ngayon ng imbestigasyon ang Muntinlupa Police Station hinggil sa insidente ng umano’y pag-aresto at pagkaladkad umano ng mga pulis sa isang 80-anyos na retiradong journalist sa loob ng bus noong Agosto 1 sa Muntinlupa City.
Batay sa Facebook post ng kolumnistang si Ramon Tulfo nitong Linggo, Agosto 3, nakakulong ngayon ang senior citizen na si Gloria Jane Baylon matapos umanong tumawag ng pulis ang kapwa nito pasahero na si alyas “Marlene” na kanyang nakasagutan. Reklamo ni alyas “Marlene”, 35, tinawag siyang “idiot” at “birdbrained” ni Baylon.
Bago ito, lumilitaw na nagsimula ang tensiyon nang makisali si alyas “Marlene” sa pakikipagtalo ni Baylon sa isa pang senior citizen. Walang pisikal na pananakit umano sa insidente kundi verbal lamang.
Subalit tumawag umano si alyas “Marlene” ng mga pulis na agad na dumating kung saan inaresto at umano’y kinaladkad si Baylon. Napunit din ang damit ni Baylon.
Pumutok ang balitang inaresto si Baylon sa Facebook post ng mamamahayag na si Gina Mape alas-10:12 ng gabi ng Agosto 1, 2025, na humihingi ng saklolo sa pamamagitan ng Facebook post para matulungan ang retired journalist, dahil ikinulong siya at walang matawagang abogado.
Umani naman ng samu’t saring reaksiyon at simpatiya ang FB post kay Baylon na hindi umano dapat kinaladkad dahil senior citizen na ito at isang babae. Binatikos din ng netizen ang isyung binanggit ni Tulfo na “malakas sa pulisya” si Marlene dahil agad na narespondehan sa simpleng alitan lamang.
- Latest
