2 Sudanese dinakip sa paglabag sa Immigration Law

MANILA, Philippines — Inaresto ng mga ­operatiba ng Bureau of Immigration (BI) Intelligence Division (ID) ang dalawang Sudanese nationals na napatuna­yang lumalabag sa mga batas sa imigrasyon ng Pilipinas noong Hulyo 22 sa San Carlos City, Pangasinan.

Ayon kay BI Commissioner Joel Anthony Viado sina Moneeb Ahmed Mohamed Yousif, 32, at Zaki Azhari Elzubair Basheer, 41, ay nahuling magkasama sa isang tirahan sa kahabaan ng M. Soriano Street sa pakikipag-ugnayan sa San Carlos City Police Station.

Kapwa bigo ang dalawa na magpakita ng mga balidong pasaporte o mga dokumento sa paglalakbay.

Inilunsad ng BI intelligence operatives ang operasyon matapos subaybayan ang patuloy na pananatili ni Moneeb sa bansa sa kabila ng hindi pag-update ng kanyang visa. Siya ay inaresto dahil sa labis na pananatili, habang si Zaki ay napag-alamang nagkukulong ng isang ilegal na dayuhan na parehong paglabag sa Philippine Immigration Act.

Nanlaban naman si Basheer nang arestuhin at binato ang mga ­operatiba. Habang nasa lugar ng San Carlos City Police Station, hini­ling niyang gamitin ang banyo ngunit sinubukan niyang tumakas sa likod ng gusali. Agad siyang tinugis at nahuli ng mga ahente ng BI.

Nakakulong ngayon ang dalawa sa BI detention facility sa Camp Bagong Diwa, Taguig, kung saan sasailalim sila sa inquest proceedings at mahaharap sa deportation charges.

“Nananatiling naka­tuon ang BI sa paghahanap, pag-aresto, at pagpapatapon ng mga ilegal na dayuhan na maaaring umaabuso sa mabuting pakikitungo ng mga Pilipino,” ani Viado.