Pinay na may bitbit na P1.2 milyong hinarang sa NAIA
Hindi deklarado
MANILA, Philippines — Isang babaeng pasahero na patungong Hong Kong na may bitbit na P1.2 milyon na hindi deklarado ang hinarang sa Ninoy Aquino International Airport (NAIA) nitong Sabado sa Pasay City.
Ang pasahero na isang 61-anyos na taga Nueva Ecija ay nasa kustodiya ng Bureau of Customs (BOC) para sa karagdagang imbestigasyon at naka-hold din doon ang nakumpiskang pera para sa serial identification.
Dakong ala-1:00 ng umaga nitong Sabado nang hindi palusutin sa NAIA Terminal 3 ang babae na patungo sanang Hong Kong.
Nakita ng x-ray operator ng Office of Transportation Security (OTS) sa NAIA Terminal 3 ang bundle ng pera sa kanyang luggage nang dumaan sa routine baggage screening.
Agad na isinagawa ang manual inspection ng mga tauhan ng BOC at at Philippine National Police-Aviation Security Group (PNP-AVSEGROUP) sa loob ng trolley bag at nalantad ang nakatagong pera.
Nabatid na malayang dalhin o ilabas sa bansa ang halagang hanggang P50,000.00 at kung higit pa rito ay kinakailangang may awtorisasyon ng Bangko Sentral ng Pilipinas (BSP).
- Latest
