Pensionado bisan piniriso
Kahibawo ka ba nga si kanhi Presidente Rodrigo Duterte makadawat gihapon sa iyang pension gikan sa nasudnong gobiyerno bisan nabalhog na sa prisohan sa International Criminal Court (ICC) sa The Hague? Dili kana ra. Magpadayon ang iyang pension bisan pa kon makonbikto siya sa crimes against humanity.
Tinuod na. Ang balaod nga naghatag og pension sa tibuok kinabuhi sa kanhi presidente (Republic Act No. 5059) nagtakda lang og duha ka sukaranan sa paghikaw sa pension: Una, kon napalagpot siya pinaagi sa impeachment; o ikaduha, kon magpapili og laing nasudnong puwesto.
* * *
Dili hinuon kasinahan ang pension ni Duterte. Gawas lang sa kabos nga retiradong mga sakop sa Social Security System (SSS) nga hangtod karon nabawo sa iyang saad nga P2,000 nga uminto sa pension (P1,000 ray nahatag).
Makadawat siya og P8,000 kada buwan (P96,000 kada tuig) hangtod sa iyang kamatayon. Mas gamay pa unta ang benepisyo kon dili pa tungod ni anhing Presidente Cory Aquino. Nga niluwat sa Executive Order No. 145 nga ni-umento sa pension gikan sa gitakda sa 1967 nga P40,000 kada tuig.
* * *
Mas buhong ang iyang anak. Si Bise Presidente Sara Duterte padayong nagdawat sa iyang suweldo bisan tulo ka semana nang nipalta sa iyang trabaho sa Office of the Vice President (OVP) kay naa magyampungad sa The Hague.
P381,748 ang binuwan nga suholan sa bise presidente. P12,724.93 ang iyang suweldo kada adlaw. Sa ato pa, nakagasto ta og P267,204 sa iyang suweldo nga, bisan 21 ka adlaw nang absent, walay deduction.
* * *
Wala pa tang kahibawo kon pilay gitangkil hangtod sa The Hague sa iyang 433 ka guwardiya. Nga gisuweldohan sa Armed Forces of the Philippines (AFP) ug Philippine National Police (PNP) og P519.6 milyones sa unang duha ka tuig niya sa OVP.
Giduphan sa bise presidente ang iyang mga guwardiya. Dihang relibohan untang pipila, nihulga siya pagkuha og pribadong security services. Espesyal gyod tingali sila kay ang dibursing officers sa OVP ug Department of Education (DepEd) iyang gisugo pagtugyan sa tanan niyang P612.5 milyones nga confidential funds ngadto sa duha ka opisyal sa Vice Presidential Security and Protection Group (VPSPG).
* * *
- Latest
