Pensyon para sa mga OFWs isusulong
MANILA, Philippines — Maghahain ng isang panukalang batas si ACT-CIS Rep. Erwin Tulfo para mabigyan ng pension ang mga OFWs ‘pag nagretiro na ang mga ito at nagpasyang manirahan na lang sa bansa.
“Mga bagong bayani ang tawag natin sa kanila dahil sa ambag nila sa ekonomiya ng bansa. Pero pag-tumanda na sila, naghihirap at umaasa na lang sa bigay ng mga anak. Ganyan ba and dapat maranasan ng isang bayani?”, ani ni Tulfo na tumatakbong senador sa ilalim ng Alyansa sa Bagong Pilipinas.
“It’s the country’s way of saying ‘thank you’ sa kanila sa pagtaguyod sa ating bansa ng ilang taon kaya marapat lamang na suklian sila ng sambayanan”, dagdag pa ni Tulfo.
Ayon pa sa mambabatas, marami-rami din sa mga OFWs ay hindi nakapag-ipon dahil inuna ang pagpapaaral ng mga anak at pagbili ng bahay.
“Ang mga DH, laborer, driver, ‘yung mabababa ang sahod ang kadalasang hindi nakakaipon dahil sapat lang ang sahod nila para sa pamilya”, dagdag ni Tulfo.
Sa panukala ni Cong. Tulfo may kontribusyon ang OFW buwan-buwan sa pension fund niya at doble o triple naman ang kontribusyon ng gobyerno sa pension ng OFW.
Ang sinasabing OFW pension ay iba pa sa makukuha niya sa SSS pagdating niya ng 60 years old.
- Latest