Snatcher na naka-AUV, arestado

MANILA, Philippines — Tila nag-level up na ang mga snatcher matapos na manghablot ng bag ng isang call center agent na babae at tumakas gamit ang isang AUV sa La Loma, Quezon City.

Sa mabilis na aksiyon ng mga tauhan ni Quezon City Police District-La Loma Police Station 1 chief, police PLt.Col. Ferdinand Casiano, naaresto ang 38-anyos na suspek.

Batay sa report naglalakad ang 40-anyos na biktima bandang alas-10 nang gabi sa Barangay Paang Bundok nang makasalubong ang isang AUV.

Isa sa mga sakay nito ang bumaba at hinablot ang bag ng biktima habang natumba naman sa semento ang huli.

Agad na nagsumbong ang biktima sa La Loma police station na agad namang nag­responde, at sinuri ang mga CCTV sa lugar na pinangyarihan ng insidente.

Makalipas ang 10-oras, natunton ng mga pulis ang kinaroroonan ng AUV at nadakip ang suspek. Hindi na nabawi ang mga gamit ng biktima.

Patuloy pang tinutugis ang mga kasamahan ng suspek na nahaharap sa kasong robbery.