Magkasintahan niratrat ng tandem, sugatan
MANILA, Philippines — Nagsasagawa ng masusing imbestigasyon ang Quezon City Police District (QCPD) sa naganap na pamamaril ng riding-in-tandem sa magkasintahan na naglalakad lang sa isang lugar sa Quezon City, kahapon ng madaling araw sa Quezon City.
Inoobserbahan sa ospital ang mga biktima na sina Gerald Francis Fabie Jaime, 33, binata, residente ng No. 039 Sitio Ulahan, Santiago, Baras, Rizal, at Dame Camille De Vila Santos-Cruz, 32, dalaga, ng No. 7A Schillin St., CBE Townhomes, Pasong Tamo, Quezon City.
Ayon sa report ni PCpl Marlon Ace Yalo, ng Eastwood City-Libis Police Station 12 ng Quezon City Police District (QCPD), ala-1:50 ng madaling araw (May 1), nang maganap ang pamamaril sa Temple Drive Ave., Brgy. Ugong Norte, sa lungsod.
Naglalakad ang mga biktima nang biglang sumulpot ang dalawang suspek na lulan ng isang motorsiklo na hindi naplakahan.
Sunud-sunod na putok na ang umalingawngaw na ikinasugat ng mga biktima.
Patuloy pa ang isinasagawang imbestigasyon ng pulisya sa motibo ng pamamaril at pagkakakilanlan ng tumakas na mga salarin.
- Latest