Mag-utol, tugis sa pananaksak ng delivery rider
MANILA, Philippines — Pinaghahanap ngayon ng mga tauhan ng Quezon City Police District - Bagong Silangan (PS13) ang magkapatid na suspek sa pananaksak sa kanilang kapitbahay kahapon ng madaling araw sa Quezon City.
Kinilala ang mga suspek na si Aldrin at Badeng Baylon, kapwa residente ng San Gabriel St. Brgy. Payatas A, QC.
Ginagamot naman sa ospital ang biktimang si Joseph Aguinaldo, 23, ng No. 74 Saint Beatriz St. Brgy. Payatas B, Quezon City.
Sa imbestigasyon ni PSSg Dexter Espino Jr., ng QCPD-Bagong Silangan, dakong alas-12 ng madaling araw habang nakikipag-iinuman ang biktima kasama ni Janine de Ocampo sa may St. Beatriz St., Brgy. Payatas A, nang dumaan ang suspek na si Aldrin at hinamon ng suntukan ang biktima.
Bagama’t agad na naawat ang dalawa, umalis ang suspek na si Aldrin at makalipas ang ilang minuto ay bumalik ito kasama na ang kapatid na si Badeng.
Dito na sinaksak ni Badeng ang biktima at saka mabilis na tumakas kasama ang utol na si Aldrin.
Tinitignan ng pulisya ang umano’y matagal nang alitan ng biktima at mga suspek.
- Latest
