Rider salpok sa trak, todas

MANILA, Philippines — Patay ang isang  rider nang sumalpok sa nakaparadang truck ang kanyang minamanehong motorsiklo, kahapon ng  madaling araw sa lungsod Quezon.

Dead-on-arrival sa East Avenue Medical Center  (EAMC) ang biktimang si Gerik Emadem, 31 at naninirahan sa Lot 17 Crescentwoods  Pingkian 2, Brgy. Pasong Tamo, Quezon City.

Nasa kustodiya na ng pulisya ang driver ng  truck na si Christopher Catayco, 38, may asawa at residente ng Mindanao Extension Santa Monica, Quezon City.

Batay sa pagsisiyasat ni PCpl. Christopher Leano naganap ang aksidente sa panulukan ng Commonwealth Avenue at Viatriz St., Barangay Old Balara, Quezon City

Sakay ang biktima ng kanyang Yamaha Sporty  at patungo  sa Elliptical Road.

Hindi napansin ng  biktima ang nakaparadang Rebuilt Fuso Wing Van Truck na may plakang CBS-6369 ng suspek at sumalpok sa likurang bahagi nito.

Tumilapon ang biktima at nagtamo ng mga sugat  sa katawan na isinugod pa sa pagamutan pero di na rin umabot ang buhay.