Lady drug suspect, timbog sa Pasig

MANILA, Philippines — Isang lady drug suspect ang naaresto ng mga awtoridad sa isang buy-bust operation sa Pasig City, kamakalawa ng gabi.

Ang suspek ay kinilala lang sa pangalang Eve, 44, vendor, at residente ng Brgy. Palatiw, Pasig City.

Batay sa ulat ng Pasig City Police, nabatid na ang suspek ay inaresto dakong alas-9:30 ng gabi, sa isang buy-bust operation sa San Agustin St., Brgy. Palatiw.

Nauna rito, nakatanggap ng tip ang pulisya hinggil sa illegal na aktibidad ng suspek kaya’t kaagad itong tinarget sa isang buy-bust operation.

Nakumpiska ng mga awtoridad mula sa suspek ang tatlong pakete na naglalaman ng nasa anim na gramo ng hinihinalang shabu at tinatayang aabot sa P40,800 ang halaga.

Ang suspek ay nakapiit na at mahaharap sa kasong paglabag sa Republic Act 9165 o The Comprehensive Dangerous Drugs Act of 2002.