Siklista bumangga sa barrier, todas
MANILA, Philippines — Todas ang isang siklista matapos bumangga ang kanyang sinasakyang bisikleta sa isang concrete barrier sa pakurbadang bahagi ng kalsada sa Marikina City, kamakalawa ng tanghali.
Nasawi ang biktima sa Amang Rodriguez Memorial Medical Center na kinilalang si Johnny Ifurong Turaray, nasa hustong gulang na residente ng Brgy. Fortune, Marikina City, bunsod nang matinding pinsala sa ulo at katawan.
Batay sa ulat ng Marikina City Police, kay Eastern Police District (EPD) Director P/Chief Supt. Reynaldo Biay, dakong 11:50 ng tanghali nang maganap ang aksidente sa pakurbadang bahagi ng East Drive Street, malapit sa Fortune High School, sa Barangay Fortune.
Sakay ng kanyang bisikleta ang biktima at binabagtas ang East Drive patungo sa direksyon ng silangan, nang pagsapit sa pakurbadang bahagi ng kalsada ay nawalan ito ng kontrol at aksidenteng nabangga ang barrier sa kanang bahagi ng daan.
Sa lakas ng impact nang pagkabangga ay bumagsak ang biktima at tumama ang ulo sa semento.
Nakita naman ng isang tricycle driver at ng kanyang pasahero ang aksidente kaya’t nagpasyang isugod sa pagamutan ang biktima ngunit hindi na naisalba pa ng mga doktor ang kanyang buhay.
Wala namang masisi ang pamilya ng biktima dahil ‘self accident’ ang nangyari.
- Latest
