Lalaki, tinarakan ng tari ng manok
MANILA, Philippines – Isang lalaki ang sugatan nang saksakin ng ilang beses ng kainuman gamit ang tari ng manok sa Marikina City, kamakalawa ng gabi.
Inoobserbahan sa Amang Rodriguez Medical Center ang biktimang si Darwin Villegas, 24, residente ng 90 Sapphire St., Marikit Subdivision, Concepcion Uno, Marikina City bunsod nang tinamong mga saksak sa likod, dibdib at dalawang kamay.
Arestado naman ang suspek na si Antonio Feblilig, 41, residente rin ng naturang lugar. Sa ulat ng Marikina City Police, naganap ang krimen dakong alas-7:00 ng gabi habang nag-iinuman ang dalawa sa naturang lugar nang magkapikunan na humantong sa mainitang pagtatalo.
Dito na umano naglabas ng tari ng manok ang suspek na ginamit sa pagsaksak sa biktima. Tinangka pa umanong tumakas ng suspek ngunit naaresto rin ng mga kaanak nito.
- Latest
