Truck driver, pahinante itinumba
MANILA, Philippines - Kapwa nasawi ang isang truck driver at kanyang pahinante nang pagbabarilin ng tatlong hindi pa nakikilalang mga salarin, kahapon ng madaling araw sa Caloocan City.
Nakilala ang mga nasawi na sina Noel Corre, 41, driver; at ang 27-anyos na si Jessie Borja, kapwa naninirahan sa Salmon St., Brgy. 8, ng naturang lungsod.
Sa inisyal na ulat ng Caloocan City Police, naganap ang pamamaril sa loob ng isang abandonadong kuwarto sa kanto ng Salmon at Sinilyasis Sts. ng naturang barangay dakong ala-1:40 ng madaling araw.
Nabatid na nakarinig na lamang ang mga residente ng naturang barangay ang sunud-sunod na putok ng baril hanggang sa makita ang tatlong hindi nakilalang mga lalaki na papaalis sa lugar.
Isinugod sa Caloocan City Medical Center ang mga biktima ngunit kapwa hindi na umabot ng buhay.
Patuloy ang masusing imbestigasyon ng pulisya sa insidente dahil sa nananatiling blangko ang motibo sa pamamaslang.
- Latest
