Bebot na police asset, itinumba

MANILA, Philippines – Natagpuang patay ang isang babae na may tama ng bala sa ulo at hinihinalang itinumba ng isang sindikato ng iligal na droga, kahapon ng madaling araw. Patuloy na inaalam ang pagkakakilanlan ng biktima na inilarawang nasa 25-30 taong gulang, nasa 5 talampakan, nakasuot ng itim at pulang stripes na jacket, abuhing pantalon, at asul na tsinelas.

Sa ulat ng Malabon City Police, dakong ala-1:28 ng madaling araw nang matagpuan ang bangkay ng biktima malapit sa Maynilad Meters, Bahay Sandigan, Block 17 Langaray St., Brgy. Longos, ng naturang lungsod. Ayon sa mga saksi, huling nakita ang biktima kamakalawa ng gabi habang kasama sa naturang barangay ang ilang kaibigang mga tomboy.

Nabatid na kilalang sangkot umano sa operasyon ng iligal­ na droga ang biktima na nagsisilbing “middleman” sa mga transaksyon ngunit kasabay nito ay asset rin umano ito ng pulisya­ laban sa mga tulak. Narekober ng mga tauhan ng Police­ Community Precinct 3 ang isang cartridge ng kalibre .45 na baril habang nagtamo ang biktima ng tama ng bala sa ulo.