Misis tinarakan ng ka-live-in habang natutulog

MANILA, Philippines – Nasa kritikal na kondis-yon ang isang ginang nang saksakin ito ng kanyang kinakasama habang natutulog ang una, kahapon ng madaling araw sa Pasay City.

Ginagamot ngayon sa Pasay City General Hospital (PCGH) ang biktimang si Mary Grace Saut, 35, nakatira sa Setiembre St., Barangay 195, Zone 20 ng naturang lungsod. Nagtamo ito ng ilang saksak sa dibdib at iba pang bahagi ng katawan.

Pinaghahanap naman ng pulisya ang suspek na si Sherwin Rait, 37, nakatira sa nabanggit na lugar.

Lumalabas sa inisyal na report, na natanggap ni Senior  Supt. Joel B. Doria, hepe ng Pasay City Police, naganap ang insidente ala-1:35 kahapon ng madaling araw sa loob ng bahay ng biktima at suspek sa naturang lugar habang natutulog si Saut kung saan kumuha ng patalim si Rait at walang sali-salitang pinagsasaksak ang kinakasama.

Matapos ang pananak­sak ay dali-daling tumakas si Rait at ang bikti­ma naman ay mabilis na isinugod sa nabanggit na ospital ng kanyang mga kaanak.

Patuloy pa rin ang isina­gawang imbestigasyon ng pulisya habang inaalam pa ang motibo sa isinaga­wang pananaksak sa biktima.