Quarters ng Army, bahay natupok

MANILA, Philippines – Tinatayang aabot sa P1.2 milyong halaga ng ari-arian ang naabo nang masunog ang ilang quarters ng Philippine Army sa loob ng headquadters nito sa Fort Bonifacio, Taguig City kamakalawa ng hapon

Sa ulat ni Col. Benjamin Lao, tagapagsalita ng PA, nasunog ang  Enlisted Personnel Quarters - 11 (EPQ - 11)  na may 10 pintuang apartment na matatagpuan sa loob mismo ng nasabing tanggapan.

Nagsimula ang sunog alas-3:30 Sabado ng hapon sa door 7 na inuokopahan ng isang Staff Sgt. Dalusong.

Tatlong Fire Trucks ng Philippine Army ang agad anyang rumesponde sa insidente habang walong  fire trucks pa mula sa Bureau of Fire Protection (BFP) Taguig City at iba pang fire volunteers ng Taguig at Pasig City ang nagtulong-tulong para maapula ang apoy.

Idineklara ng fire marshal ng Philippine Army na fire out ang sunog alas  4:40 ng hapon.

Umabot naman sa 10 pamilya ang naapektuhan ng sunog na ngayon ay nagkakanlong sa Enlisted Personnel Transient Quarters.

Samantala, P1-M halaga ng ari-arian din ang natupok sa sunog na naganap sa Pasig City, kahapon ng madaling araw.

Sa ulat ng Bureau of Fire Protection sa Pasig City, nabatid na ang sunog ay naganap dakong alas-12:05 ng madaling araw sa Jade St., Donya Juliana Village, Brgy. Rosario, Pasig City sinasabing sa likurang bahagi ng bahay ng pamilyang Garcia nagsimula ang apoy na mabilis na kumalat sa kabuuan ng dalawang apartment dahil gawa lamang sa light material.

Nagtagal ng mahigit sa isang oras ang sunog bago tuluyang naapula.

Inaalam ngayon ng mga awtoridad kung may foul play o sinadya ang nasabing sunog na wala namang naiulat na nasawi at nasaktan.