Pagsasara ng Ayala bridge, tigil muna

MANILA, Philippines — Inihayag ng Metropolitan Manila Development Autho­rity (MMDA) na hindi na muna itutuloy ang rehabilitasyon ng Ayala Bridge na nakatakda na sanang simulan sa unang linggo ng Marso.

Nabatid kay MMDA Chairman Francis Tolentino, ka­ila­ngan pa nilang pag-usapan ang traffic management pre­parations sa pagitan ng  pamahalaang lokal ng Maynila bago ituloy ang bridge repair.

Ayon kay Tolentino, ang  re­­habilitasyon aniya ay na­­ngangailangan ng total closure ng tulay at kaila­ngang ma­ibsan ang magiging epekto nito sa riding public.

Kailangan pa aniyang magprisinta ng kanilang traffic ma­nagement plan ang Department of Public Works and Highways (DPWH).

Gayundin ang pakikipagpulong sa mga stakeholders na inaasahang maapektuhan nang pagkukumpuni ng na­turang tulay.

Orihinal na itinakda ang bridge repair sa darating na Marso 2 o 4 ng taong kasa­lu­kuyan at tatagal ng may tatlong buwan.

Mungkahi ni Tolentino  na ituloy na lamang ang  repairs  pagtuntong ng summer na kung saan naka-break ang mga eskuwelahan.

Ang mga pangunahing kal­sada na nasa bisinidad ng Ayala Bridge na posibleng maapektuhan ng naturang proyekto ay ang Quezon Blvd., United Nations Avenue, Taft at Quirino, Legarda, Magsaysay, Recto hanggang  Roxas Blvd.