Tanod dinedo ng kabaro
MANILA, Philippines – Makaraang alaskahin, pinatay pa ng isang barangay tanod ang kanyang kapwa tanod kamakalawa ng gabi sa Tondo, Maynila.
Namatay habang ginagamot sa ospital ang biktimang si Alier Aparis, 49, ng #04 Romana Ext. Tondo, Maynila sanhi ng dalawang saksak sa dibdib habang pinaghahanap naman ang suspek na si Hapelito Obrique, alyas Jun,40.
Sa imbestigasyon ni PO3 Dennis Turla ng Manila Police District-Homicide Section naganap ang insidente ng bandang 8:00 ng gabi sa kahabaan ng Romana Ext. malapit sa panulukan ng Roxas St., sa Tondo.
Lumilitaw na volunteer tanod ang biktima at nagtitinda din ng alkansiya nang lumapit ang lasing na suspek at saka inasar ang una hanggang sa humantong sa mainitang pagtatalo.
Bagama’t napaghiwalay, muling binalikan ng suspek ang biktima makalipas ang ilang minuto at agad na sinaksak ng kutsilyo ang biktima.
Hindi naman nagawang mapigilan ang suspek kaya’t mabilis itong nakatakas.
- Latest
