Umayaw sa sugal, tinarakan
MANILA, Philippines - Dahil sa pag-ayaw sa sugal habang nananalo, isang kawani ang sinaksak ng isa sa mga kalaro nito, kahapon sa Pasay City.
Inoobserbahan ngayon sa Ospital ng Maynila ang biktimang si Rolando Soriano Jr., 24 ng Leveriza St., ng naturang lungsod sanhi ng tinamong ilang saksak sa katawan.
Base sa report na nakarating sa tanggapan ng Station Investigation and Detective Management Branch (SIDMB), Pasay City Police, naganap ang insidente alas-12:55 ng madaling-araw sa panulukan ng Progreso St., at Gil Puyat Avenue, Brgy. 20 ng naturang lungsod.
Nakikipaglaro umano ang biktima sa pitong kalalakihan ng sugal na cara y cruz at dahil nananalo na umano ito ay bigla itong umayaw.
Dahilan naman upang maasar sa kanya ang ilang kalaro nito hanggang isang lalaki ang bumunot ng patalim at inundayan ng saksak ang biktima.
Matapos ang pananaksak ay kanya-kanyang nagpulasan ang mga kalaro ng biktima kasama ang sumaksak dito.
- Latest
