1 todas, 2 sugatan sa tandem
MANILA, Philippines - Isang lalaki ang patay habang dalawa ang sugatan makaraang paulanan ng bala ng riding in tandem habang ang mga una ay masayang nagkukuwentuhan sa isang kalye sa lungsod Quezon kamakalawa ng gabi.
Dead on arrival si Jeffrey Padua, 22 ng Abad Santos St., Bgy. Sta Lucia sa lungsod samantalang ginagamot naman sa Quezon City General Hospital sina Heidi Capili, 16, at Gilbert Ang, 37 residente din sa nasabing lugar.
Sa ulat ni PO2 Erickson Isidro, ng QCPD-CIDU, dalawang lalaki na pawang nakasuot ng helmet ang mabilis na tumakas sakay ng isang motorsiklo ang responsable sa krimen.
Nangyari ang insidente sa kahabaan ng P. Burgos St., corner J. Abad Santos St., Bgy. Sta. Lucia, ganap na alas-9:45 ng gabi.
Ayon sa saksi nagkukuwentuhan silang magkakaibigan nang dumaan ang isang motorsiklo na may isang angkas sa likod.
Mabilis itong lumiko at huminto saka nagbunot ng kanilang baril at sunud-sunod na pinaputukan ang mga biktima, saka mabilis na nagsipagtakas.
Patuloy ang imbestigasyon ng otoridad sa nasabing insidente.
- Latest
