Mister dinedo sa harap ng misis, anak
MANILA, Philippines – Utas ang isang mister matapos itong barilin ng hindi pa kilalang suspek sa harap mismo ng kanyang mag-ina, kamakalawa sa Makati City.
Dead on arrival sa Makati Medical Center (MMC) ang biktimang si Jesstony Saddie, ng Villanueva St., Pasay City sanhi ng tinamo nitong ilang tama ng bala sa ulo buhat sa hindi pa batid na kalibre ng baril.
Nagsasagawa pa ng follow-up operation ang pulisya hinggil sa insidente at inaalam na ang pagkakakilanlan ng suspek.
Base sa report na natanggap ni Senior Supt. Ernesto Barlam, Officer-In-Charge (OIC) ng Makati City Police, naganap ang insidente alas-2:00 ng hapon sa harapan ng La Paz Building, panulukan ng Salcedo at Rufino Sts., Legazpi Village ng naturang lungsod habang pasakay ng taxi ang biktima, kasama ang misis at ang 5-taong gulang na anak nitong lalaki nang biglang sumulpot ang suspek na armado ng baril.
Kaagad na pinutukan sa ulo ang biktima dahilan upang bumulagta ito at dali-daling dinala sa naturang ospital si Saddie, subalit hindi na ito umabot ng buhay.
Samantala, matapos ang pamamaril ay mabilis na tumakas ang suspek na naglalakad lamang.
Inamin sa pulisya ng ina ng biktima, na sangkot umano ito sa ilang insidente ng salisi.
Isa pa sa teyorya ng pulisya posibleng motibo sa pagpaslang ay onsehan sa partihan ng biktima at suspek dahilan upang paslangin ito. Sa ngayon ay patuloy na iniimbestigahan ang naturang insidente.
- Latest
